17. Кор[оль] Жигимонт надає Юрію Муховецькому три конфісковані по козаках доми в Києві. 14 грудня 1597 р.

Михайло Грушевський

Данина Юрю Муховецкому на три домы в месте Киеве.

Жикгимонт третий.

Ознаймуемъ тымъ листомъ нашымъ всим вобецъ и кождому зособна, кому то ведати належыть нинешнымъ и напотомъ будучымъ, иж маючы ласкавый взглядъ на службы урожоного Юря Муховецкого, становничого двору нашого, которыми он нам господару обецне на службе нашой трваючи добре, верне и цнотливе служылъ и служити не переставает, и хотечи то ему ласкаве вызнати и вперед сего охотнейшого ку службамъ нашымъ учынити, умыслили есмо ему дати домов три у месте нашомъ Киеве, по козакох яко зрайцах речи посполитое и нашихъ до шафунку нашого спалые, якож и тымъ листомъ нашымъ пререченые домы – одинъ по Басянскимъ, другий подле тогож дому о стену козацкий же, в котором Янко кравець мешкаетъ, третий по Ивнивку, помененому Муховецкому ему самому, жоне, дѣтемъ и потомству его правом вечнымъ, по тому яко то на нас спало, зо всѣми тых домовъ пожытками, з огородами, з сеножатми и иными доходами их и повинностями, заховавшы вцале право и юриздицыю, под которою тые домы бывали и на сес час сут, даем и даруемъ вечными часы: воленъ будетъ тот то Муховецкий сам, жона и потомство его тыми домамы якъ хотечи шафовати, отдати, продати, заменити и ку належитому пожитку своему оборочати на всѣ потомные часы. И на то есмо дали сес нашъ листь с подписомъ руки нашое кролевское и под нашою печатю коронною.

Писань у Варшаве лѣта Божого нароженя тисеча пятсот деветдесят семого месяца декабра четырнадцатого дня, а панованя кролевствъ нашихъ полского десятого а шведского четвертого року. Sigismundus Rex. Florian Oleszko.

Записі В. кн. 11, л. 158.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 332.