9. Королівський суд зобов’язує печерський монастир позичені ним від козака Шаули 100 кіп виплатити Еразму Коморовському. 7 жовтня 1596 р.

Михайло Грушевський

Декреть меж Коморовскимъ а архимандрытомъ киевскимъ и чернцами тогож монастыря.

Жикгимонть третий.

Ознаймуемъ тымъ листомъ нашим всѣмъ вобецъ и каждому зособна нинешним и напотом будучимъ, иж кгды ся приточила перед насъ и судъ нашъ нинешний асесорский справа с позву задворного меж инстыкгаторомъ нашимъ за делацыею урожоного Еразмого Коморовского жолнера нашого яко поводом – з одное, а меж велебными Никифором Туром архимандрытом киевскимъ и чернцами печерскими – капитулою монастырскою, также попомъ воскресенскимъ того ж манастыря Печерского яко позваными – з другое стороны, о то иж дей будучи позваные упомнены, абы речи лежачие и рухомые и гроши на долгахъ зосталые ниякого Шаулы козака зрайцы речи посполитое и нашого, поводови тое справы от нас даные, ему яко донаторови отдали и уистили, которыхъ то таковыхъ речей позваные иж у себе их быти не поведали и не признали, инстикгаторъ нашъ з деляторомъ на осмъ тисечей копъ грошей шкоды для того положивши и о то все их до права притегнулъ, – на року теды нинешнемъ за тымъ позвомъ прыпаломъ и до того часу стягаючимся, месяца октебра семого дня року девятдесят шестого за третимъ проволанемъ через возного двору нашого от стороны позваное умоцованый ихъ Матей Важинский озвавшисе, высветчилъ ся листом кашталяна каменецкого урожоного Якуба Претвица, же жадных речей Шаулиныхъ позваные не брали, ани ихъ у себе мають, над то ку отводу бралсе.

А инстыкгатор нашъ з деляторомъ доведечи того, же архимандрить ста копъ литовских у Шаулы позычилъ, и показалъ опис архимандрычий, где познавает с чернцами, же Шаула такъ великое сумы позычившы, певные добра церковные в той суме заставилъ. На то отъ архимандрыта поведено, иж о именье церковное идеть, которые былъ Шаула певнымъ правемъ до часу певнего пустилъ, таковыхъ добръ церковныхъ иж ему утрачати до неког[о] не годитсе, прошоно от того волности. А инстыкгаторъ такъ то ему выводилъ, же ся деляторъ тое справы не упоминаеть, имел ся одно сумы ста копъ, которая никому иному по Шауле одно ему яко донаторови належит.

Суд нашъ асесорский, припатрившисе записови архимандрычому, в котором иж ясней се долгъ Шауле служачий показалъ, про то декретомъ своимъ сказалъ, абы архимандрытъ с попом воскресенскимъ вышей реченымъ самотрет присегнули на томъ, яко речей Шаулиных не брали, у себе ихъ не ховали, не мели, ани ихъ мают; а кгды присягнуть, теды архимандрыт с чернцами сто копъ, которую былъ Шауле виненъ, Еразмови Коморовскому заплатити мает и повиненъ будеть под заруками такъ великое ж сумы, винами, в праве посполитомъ описаными, где бы тое сумы не заплатилъ або в чомъ сему декретови нашому досыт не учинилъ.

Которой заплате сту копамъ к присязе рок складаемъ в кгроде киевскомъ от даты сего декрету нашого по выйштю шести недель на першихъ рочках кгродских киевских: тамъ на он час стороны обе будуть мети рокь завитый, такъ позваная ку выконаню присеги и заплаченю ста копъ, як поводова, Еразмий Коморовский – ку прислуханю се и браню тое ста копъ за моцю того декрету нашого; до которого на болшую твердость и печат нашу коронную притиснути есмо казали.

Писанъ у Варшаве лѣта Божого нароженя тисеча пятсот деветдесят шостого месяца октебра семого дня, а панованя кролевствъ нашихъ – полского девятого, а шведского третего року. Joan Tharnowsky r[egni] P[oloniae] vicecancell[arius]. Справа велебного в Бозе его милости ксендза Яна Тарнавского, влоцлавского й ленчицкого пробосча, подканцлерого коронного. Florian Oleszko.

Записі В. кн. 11, л. 96 v.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 319 – 320.