15. Королівський суд звільняє шл[яхетного] Тимофея Краснодворського від претензій шл[яхетного] Симона Холоневського на його майно, ніби сконфісковане за участь в козацьких рухах. 1 грудня 1597 р.

Михайло Грушевський

Декрет меж Тимофеемъ Марковичомъ а Сымоном Холоневскимъ.

Жикгимонтъ третий.

Ознаймуемъ тымъ листомъ нашимъ etc., иж кгды приточиласе перед нас в суд нашъ нинешный справа с позву задворного межы инстыкгаторомъ нашымъ з однесеня шляхетного Сымона Холоневского, жолнера нашого яко поводомъ – з одное, а межи шляхетнымъ Тимофеемъ Марковичомъ Краснодворскимъ позванымъ – з другое стороны о то, иж якобы позваный не хотелъ всихъ добръ рухомыхъ и лежачыхъ, преречоному Холоневскому от нас за заслуги его даныхъ отдати и поступити, которые то добра якобы на насъ по позваномъ правомъ кадуковымъ припали с тых причинъ, иж позваный якобы зъ зрайцою нашым и речы посполитое Наливайком над заказане покой посполитый взрушиваючы, по колко кроть панства цесара Турецкого воевалъ, а потом зъ земли Турецкое вернувшысе знову панства нашы корунные и великого князства Литовского, также маетности шляхецкие по розных местцахъ наездчаючы лупилъ и плюндровалъ, и иншихъ много выступковъ злыхъ яко бы наброил, и за тым вины в праве посполитомъ о бунтовникахъ и взрушителяхъ покоя посполитого описаные подпалъ, о чомъ ширей и достаточней на томъ позве есть описано и доложено, – на року теды нинешнемъ за тимъ позвомъ припаломъ и до того часу стегаючомсе, месяца декабра первого дня року тисеча пятсот деветдесять семого, кгды позваный Краснодворский инстикгатора нашого и делятора Холоневского выш реченого через возного двору нашого шляхетного Крыштофа Чижевского ведле права волынского по три дни далъ приволывати, инстикгаторъ и деляторъ Холоневский, будучы самъ же поводомъ справы выш реченое, за проволыванемъ до права першого, второго и остатнего нинешнего дня не сталъ и не озвалсе и теж никоторое ведомости судови и ни стороне противной о собе знати не далъ, за которымъ нестанемъ и не попиранемъ тоее справы сторона позваная домовяласе, абы преречоных инстикгатора и Холоневского яко делятора в нестаномъ здавшы от року позву и речы в немъ описаное волным учинено было.

Суд нашъ асесорский прихиляючысе до права посполитого, поневаж Холоневский яко делятор однешшы тую справу до инстикгатора нашого, самъ ку праву, яко на завитый рокъ не стал и оное не попиралъ, за нестанного допустившы здати, сторону позваную – Краснодворского от року и позву нинешным декретомъ волнымъ учынилъ, иж вжо от делятора Холоневского о то позыванъ и далей трудненъ и повлачанъ быти не мает. А на болшую твердость до того декрету и печать наша коронная притиснена есть.

Писанъ у Варшаве лѣта Божого нароженя тисеча пятсот девятдесятъ семого месяца декабра першого дня, а панованя кролевствъ нашыхъ полского десятого а шведского четвертого. Joan Tharnowsky, vicecancell[arius]. Справа велебного в Бозе его милости ксендза Яна Тарновского, номината познанского, подкоронного. Florian Oleszko.

Записі В. кн. 11, л. 150 v.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 329 – 330.