10. Король надає київському підчашому Івану Лозці ур[очище] Халеп і порожній пляц у Києві, сконфісковані від учасників повстання. 19 вересня 1596 [p.].

Михайло Грушевський

Привилей Лозце на Халеблъ и на плацъ пустый у Киеве.

Жикгимонть третий.

Ознаймуемъ тым листом нашим всим вобец и кождому зособна, кому тое ведати належит тепер и напотом будучим, иж мы маючи ласкавый взгляд на службы урожоног[о] Ивана Лозки подчашого киевского, которими он есче за продков наших королей их милостей полских так и за нашого счасливого панованя верне и зычливе на Украине служилъ и служити не переставает з нелитованемъ кошту и здоровя своего, и хотечи то ему ласкаве вызнат и впередъ сего охотнейшого ку службе нашой господарской и речи посполитое учинит, дали есмо ему правомъ кадуковымъ урочисче над Днепром Халеплъ по Гришку и по Яску Халепскихъ, яко по зрайцах р[е]чы посполитее и наших, до того пляц пустый в Киеве по нияком Луполовзе [Кінець сього слова неясно написаний.], таковом же зрайцы нашом, – якож и тым листом нашим преречоному Лозце подчашому киевскому, ему самому, жоне, детем и потомком его преречоные добра яко спадковые вечными часы даемо: волен онъ будет тыми добры яко своими властьными шафовати, отдати, продати, заменити и где хотечи их подети алъбо обернути, а то ему самому, жоне, детем и потомком его от нас и отъ наяснейшихъ потомковъ нашихъ королей их милостей польских варовно, непорушно, держано и ховано быти мает. И на то дали есмо помененому Лозце сес нашъ листь с подписанъем руки нашое королевъское, до которого и печат нашу коронную притиснути росказали есмо.

Писанъ у Варшаве року нароженя сына Божего тисеча пятсот деветдесят шостого мѣсяца сентебра дванадцятого дня, а панованя королевствъ наших полского девятого, а шведского третего року. Sigismundus Rex. Florian Oleszko.

Записі В. кн. 11, л. 100 v.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 320 – 321.