11. Королівський асесорський суд засуджує жида Левона Перцевича, аби виплатив Лавріну Лозці 2000 коп за переховані у нього гроші й речі Григорія Лободи. 1 жовтня 1596 р.

Михайло Грушевський

Декреть межъ Лавриномъ Лозкою а меж Левоном Перцевичом Жидом.

Жикгимонтъ третий.

Ознаймуемъ тымъ листомъ нашимъ всѣмъ вобецъ и кождому зособна, кому того ведати належит, иж кгды приточиласе перед нас и суд нашъ нинешний асесорский справа с позву задворного межы инстыкгатором нашымъ за деляциею урожоного Лаврина Лозки жолнера нашого яко поводомъ – з одное, а меж Левономъ Перцевичомъ Жидомъ яко позваным – з другое стороны о то, иж нинешний позваный будучи дей упомненый о добра прехованые у себе ниякого Григорья Лободы козака, зрайцы нашого и речы посполитое, абы оные яко сумы пенежные и речы рухомые также на долгахъ листами уищоные преречоному Лозце яко донаторови отдал и во всем ся уистил, чого ижъ позваный не услухалъ и таковых речей отдати не хотел, инстыкгатор нашъ з деляторомъ на две тисечи копъ литовскихъ таковые речи ошацовавши, шкоды засе также много за то положилъ и о то все ку справедливенью се нинешнего позвалъ, – на року теды нинешнемъ за тымъ позвомъ припаломъ а до того часу стегаючомся месяца октебра семого дня року деветдесять шостого кгды ся справы судовые задворные порядкомъ своимъ звыклым отправовали, инстыкгаторъ нашъ з деляторомъ тое справы вышей речоное, давши по три дни сторону позваную Жида Левона до суду приволати, леч ижъ се преречоный Жидъ на першомъ дню и на остатнемъ третемъ яко на завитомъ не озвалъ се и никоторое ведомости о собе судови и стороне своей противной знати не далъ, теды инстыкгаторъ нашъ з деляторомъ доведши в той справе положеня позву реляцыею возного, преречоного Жида в нестанномъ яко права непослушного на упад во всем, о што позван был, в зыску здал, и домовялсе, абы за речы Лободины при позваном осталые две тысячи копъ литовскихъ и засе особно за шкоды также две тысечи копъ ведле позву на маетности позваного и на особе его всказаны были.

А такъ судъ нашъ асесорский, заховуючисе ведле права посполитого, преречоного Левона Жида яко непослушнаго права посполитого здати на упадъ во всемъ томъ, о што былъ позванъ, допустивши, суму пенязей в позве описаную чотыри тисечи копъ грошей на маетности его, а в недостатку маетности и на особе его всказалъ и присудилъ тымъ декретомъ нашимъ, и тую всю справу со всѣмъ ее скуткомъ до вряду и староства належного, в которых бы добра пререченого позваного были, на отправу и екзекуцыю порядкомъ статутовымъ ведле конституцыи о отправах речей осужоных написаное и под винами на врядниковъ недбалых в праве и в констытуции описаномъ отослалъ моцью того декрету нашого; до которого на болшую твердость и печат нашу коронную притиснути есмо казали.

Писанъ у Варшаве лѣта Божого нароженя тисеча пятьсот деветдесять шостого месяца октебра семого, а панованя кролевствъ наших полского девятого, а шведского року третего. Joan Tharnowsky r[egni] P[olonise] vicecancell[arius]. Справа велебного в Бозе его милости ксендза Яна Тарновского, краковского, влоцлавского и ленчицкого пробосча, подканцлерого коронного. Florian Oleszko.

Записі В. кн. 11, л. 103 v.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 321 – 322.