6. Рішення королівського асесорського суду в справі Еразма Коморовського з шл[яхетним] Олександром Остроухом та його пасербницею Богданою Саськовою про майно козака Саська, ніби сховане Остроухом. 20 вересня 1596 p.

Михайло Грушевський

Декрет меж Комаровскимъ а Александром Остроухомъ и Сасковою пасербицею его Богданою.

Жикгимонт третий.

Ознаймуемъ тымъ листомъ нашимъ всимъ вобец и кождому зособна нинешнимъ и напотомъ будучимъ, иж кгды приточиласе перед нас и суд нашъ асесорский справа с позву задворного межи инстикгаторомъ нашим за деляцыею урожоного Еразма Коморовского жолнера нашого яко поводомъ – з одное, а межи шляхетнымъ Александромъ Остроухомъ и Сасковою, пасербицою его, Богданою яко позваными – с другое стороны, о то ижъ будучи упомнеными мандатомъ нашимъ преречоные позваные, абы вшелякие добра лежачие и рухомые по Сасъку козаку, яко по зрайци нашом, от нас деляторови тое справы отданые, были ему пусчоны и зуполне отданы, которых то речей по Саску позваные верху речоные не признавали и ни о яких у себе быти не поведали, за чимъ на осмъ тисечей копъ грошей делятор тое справы положивши, позвалъ ку праву, – на року теды нинешнемъ за тымъ позвомъ припаломъ и до того часу стегаючомсе дня нинешнего месеца сентебра двадцатого кгды обе стороне на першомъ приволаню, не ждучи водле права волынского третего дня, озвавшисе, напервей умоцованый стороны поводовое шляхетный (вільне місце) Витовский, доводечи на Остроуха, яко речи Сасковы при нем зостали, показовалъ листы сведечные подвоеводего и городничого, урядников киевских, в которых пишет, иж ниякий Миско, сестренец Сасков, поведает речи вуя своего при Остроуху зосталые.

Противко тому сторона позваная преречоный Остроухъ, самъ от себе и от пасербици своее справуючисе того, ижъ жадные речи Сасковы в дому его не зостали ани он в них корыстил, боронилсе высветченьем и листами никоторых обывателев и месчан киевских, над то бралсе ку присязе, же жадных речей Сасковых не брал, ани их в себе маеть и в дому своемъ не ховалъ.

А такъ суд нашъ асесорский прислухавшесе добре споромъ обоее стороны и листомъ сведочнымъ от обое стороны показованымъ припатрившисе, бачечы с права посполитого, же в речах вонтпливых близший завжды обвиненый ку отводу бывает, про то Александра Остроуха с пасербицею его Богданою ку отводу в тей справе припустивши, присегнути самотретему з шляхтичами собе ровными наказалъ на томъ, яко жадных речей Сасковых не брали, в себе их не мели и в дому своемъ не ховали.

Которую присегу сторона позваная повинни будет выконати от дати сего декрету нашого за шесть недель на рочках кгродских киевских, которые напервей по выштью шести недель сужоны будут, и тамъ уже обоя сторона рокъ певный и завитый мети будуть: такъ позваная ку выконаню тое присеги яко и поводовая ку прислуханю се, за моцю того декрету нашого, до которого и печать наша коронная притиснена есть.

Писан у Варшаве лет. Бож. нарож. 1596 месеца сентебра 20 дня, а панованя кролевствъ наших полского девятого а шведского року третего. Joan Tharnawsky, r[egni] P[oloniae] vicecancell[arius]. Справа велебного Яна Тарнавского, краковского, иновлоцлавского и ленчицкого пробосча, подканцлерого коронного. Florian Oleszko.

Записі В. кн. 11, л. 94.

Примітки

Подається за виданням: Грушевський М.С. Твори у 50-и томах. – Львів: Світ, 2004 р., т. 6, с. 315 – 316.